Azerbaýjan bilen Türkmenistanyň Prezidentleri Şuşa metjidindäki gurluşyk işleriniň barşy bilen tanyşdylar
23-nji iýunda Azerbaýjan Respublikasynyň Prezidenti Ylham Aliýew hem-de Türkmenistanyň Prezidenti Serdar Berdimuhamedow Şuşa metjidindäki gurluşyk işleriniň barşy bilen tanyşdylar.
Prezidentiň kömekçisi Anar Äläkberow Azerbaýjanyň we Türkmenistanyň döwlet Baştutanlaryna metjitde ýerine ýetirilen işler barada maglumat berdi.
Bellenilişi ýaly, düýbi 2021-nji ýylda Azerbaýjan Respublikasynyň Prezidenti tarapyndan tutulan metjit taryhy şäheriň täze döwrebap nyşany hökmünde bina edilýär.
Ýeňiş gününiň nyşany hökmünde 8 san görnüşinde taslanan metjit esasy ybadathana binasyndan, dolandyryş binasyndan, şeýle hem erkekler we zenanlar üçin täret jaýlaryndan ybarat bolar. Boýy 73 metr bolan iki minarasy bolsa Şuşanyň ýylyň on birinji aýynda azat edilmeginiň nyşany hökmünde 11 sany alamatlandyrar.
Bu ybadathananyň daşky bezegi Şuşanyň gadymy metjidiniň minaralarynda ulanylan geometrik nagyşlar bilen bezelýär. Metjidiň gurluşygy “Paşa Holding” kompaniýasynyň goldawy bilen amala aşyrylýar.
Täze gurulýan metjit Azerbaýjanyň basyp alyşlykdan azat edilen çäklerinde alnyp barylýan dikeldiş we gurluşyk işleriniň möhüm taslamalarynyň biri bolup, Garabagyň täzeden galkynyşyny hem-de halkyň milli we ruhy gymmatlyklaryna ygrarlylygyny şöhlelendirýär.
